今日就同大家推介下越南胡志明市嘅一啲熱門景點～胡市明市嘅建築用色亦好有少女心，真係好上鏡！💖所以我哋快啲一齊去睇睇有啲咩靚嘅打卡同參觀景點啦！
📍#胡志明市西貢中央郵局
呢座淡黃色嘅郵局建於1886-1891年，外形揉合咗法國同越南嘅建築同裝飾風格，係越南文藝復興建築之一，非常具指標性🏤郵局獨特嘅設計亦令佢成為胡志明市嘅熱門觀光景點🌟而郵局嘅室內設計運用咗拱形窗同自然採光，令成個環境嘅空間感大大提升，好闊落⬆️大家參觀完仲可以喺度揀返張明信片寄俾自己或者親朋好友做個留念📮
📍#西貢聖母教堂
越南嘅胡志明市真係有好多好靚嘅教堂，而跟住落嚟要介招嘅就係位於市中心最大嘅教堂💒聖母教堂由唔同尖頂塔樓同紅色磚塊構成，因此又名紅教堂🧱樸素嘅磚牆同教堂嘅兩座鐘樓亦成為咗係當地標誌性嘅建築景點之一～
（但教堂目前因為裝修工程所以內部不設參觀🥲所以大家暫時只可以喺外圍影下相留個念想）
📍#濱城市場
喺濱城市場大家可以買到好多充滿越南本土特色嘅土產各式各樣嘅記念品，記得要貨比三家格下價～🛍行到攰仲可以試埋唔同嘅街頭小食，真係諗到都流晒口水🤤💸
📍#金龍水上木偶劇院
水上木偶戲係越南一項歷史悠久嘅民間傳統，亦係越南嘅國寶級技藝之一🤩木偶劇嘅劇情通常會以民間故事同越南嘅歷史文化為主軸，等大家可以透過木偶劇靈活生動嘅演出同劇情加深對越南文化嘅認識🇻🇳
📍#古芝地道
古芝地道被稱係越戰中最不可思議嘅遺址，係一條全長200公里嘅地道系統亦係當時打仗嘅軍事基地🪖地道入面可以話咩都齊，瞓覺嘅地方、儲糧庫、會議室甚至連醫院都有！🏥😦相信親身望到地道嘅一切嗰刻一定會好震撼，雖然話入面嘅設備咁齊全但其實真係好難想像到呢條地道曾經係多個越南士兵生活同匿埋嘅地方，相信透過親臨地道可以等大家以另一種形式嚟去了解當年越戰嘅歷史
📍#新定教堂
最後要同大家介紹嘅自由行景點就係呢間pink pink粉嫩色tone嘅新定教堂喇！呢間教堂嘅外形真係點影都好好睇！咁可愛嘅外形亦都吸引咗唔少當地人同遊客去打個靚卡📷影到攰仲可以去對面嘅coffee shop度休息☕️～
